Монгол эрчүүд хамгийн муухай нь гэж үү?

Монгол эрчүүд хамгийн муухай гэж үү? Архи уудаг, тамхи татдаг, боловсролгүй, адгийн наад захын соёлгүй, эхнэрээрээ тэжээлгэдэг гээд л ... Өөр юу билээ?

Магадгүй та үүн дээр нэмэх зүйл дотроо бодож байж болох юм. Гэхдээ зөвхөн монгол эрчүүд маань л ийм гэж үү? Харь орны эрчүүд сайхан сайхан гэж, харин халх эрс маань болохоор хамаг л муу муухай, болохгүй бүтэхгүй болгоны жишээнд дурьдагдаж байх. Үнэндээ хаа газрын эрчүүд адилхан.

Уудаг уу уудаг. Татдаг уу татдаг. Та бид л мэдэхгүй болохоос биш магадгүй манайхнаас ч илүү муу байгаа. "Айлын хоол амттай" гэдэг. Дэргэд нь очиж, нүдээрээ харж, гараараа барьж үзээгүй байж сайн сайхныг нь шагшин магтаад л... Манайхны туйлшруу зан ч юм уу.

"Боловсролгүй" гээд л голдог. Яагаад болвсролгүй болчихсон юм бээ? Охин хүүхдээ "миний муу охин хүний царай харахгүй амьдраг" гээд суралцахыг нь бүх талаар дэмждэг атлаа хүүгээ тэгдэггүй. Эр хүн аргаа олно гээд л орхичихдог. Охиндоо санах тавьж буй нь зөв. Туйлын зөв. Гэхдээ үүнээсээ илүү гарахгүй гэхэд, дутахааргүйгээр хүүгээ ч бас анхаарч байгаасай. Тэгвэл таны хүү хэнд ч гологдохгүй, санаа зовохгүйгээр гэр бүлээ аваад явчихаар болно.

Хэрвээ та анзаарсан бол "Эр хүн шиг эр хүн олдохгүй юм" гэж ярих бүсгүйчүүдийн тоо ихэссэн. Бид өөрсдөө эхлэлийг нь буруу тавьсан юм байж одоо болохоор үүндээ гомдоллоод л сууцгааж байдаг. Бид гэж бид нар. Эмэгтэйчүүд бүсгүйчүүд. Угтаа бол эмэгтэй хүн л эр хүнийг эвддэг. Цалин орлого багатай, гадуур дотуур тэнэдэг гэж эхлээд л "хөрөөдөж" гарна. Энэ үед хэтэвчин дэх хэдэн зоос нь чухал байхаас биш хайрлаж дурлан байж ханилсан эр нөхөр нь гэдгээ мартдаг. Мэдээж эр хүн гэр бүл, амьдралаа авч явах ёстой боловч энэ зөвхөн ганцаараа зүтгэх ёстой гэж үү? Хамтдаа босгосон амьдралд хамтдаа л хичээж зүтгэх ёстой.

Халамцуу утсаар ярьсан, согтчихоод уйлаад байсан гэж ярьж байсан бүсгүйг та сонсож байсан л байх. Эсвэл танд өөрт тань ч ийм зүйл тохиолдож байсан байх. Ядаргаатай юм гэж бодож байснаас "яагаад?" гэж боддог гэж үү? Хар багаас нь "Эр хүн уйлдаггүй юм" гээд хүмүүжүүлчихдэг болохоор Монгол эрчүүд дотогшоо уйлдаг. Дотроо шаналдаг. Тэрнээс биш гадныхан шиг сэтгэл зүйчид очоод, эсвэл уулан дээр гараад орилж хашгирч чадахгүй. Тэгээд л тэснэ тэснэ гэхэд яаж тэсэх вэ гээд багахан юм балгачихаараа итгэдэг ганц хүндээ гэж сэтгэлээ уудалж байгаа нь тэр ... Түүнийг ойлгохыг хичээ. Тэр бидэнтэй адилхан найз охидтойгоо чалчиж, дотроо онгойлгож чадахгүй.

Хүндлэл хүндлэлийг, хайр хайрыг төрүүлдэг. Жендерийн тэгш эрх гэж ярихаасаа урьтаж, Эр хүнийг "Өрхийн тэргүүн минь билээ" хэмээн хүндэлж, цайныхаа дээжийг барь. Тэглээ гээд бүсгүй та тэгш эрхээ алдаж байгаа хэрэг огтхон ч бишээ. Тэргүүн хэдий байвч хүзүүгүй бол тогтохгүй. Ухаалаг толгойг сайн хүзүү тулж, бас чиглүүлж байхгүй бол толгой хол явахгүй. Тиймээс та найдвартай, түшигтэй бас салж боломгүй тийм л хүзүү байх хэрэгтэй. Хятад, Солонгос, Япон эрчүүдийг алхаж явааг нь нэг хараарай. Ямар ч Монгол эр хүн тэгж алхахгүй. Үнэндээ Монгол эрс маань алхаа нь хүртэл уужуухан, тавиу. Эх нутаг шигээ уудам сэтгэлтэй эр хүн хэзээ ч түм түжигнэж бум бужигнасан хотдоо гишгэх газар олдохгүй байгаа мэт ойрхон гишгэлж “сайрга сайрга, жорон жорон” гэж явдаггүй. Цаанаа л нэг сэтгэл уужирмаар. Хараад тайвширмаар. Надаас ялгаагүй зөөлөн булбарай арьс, танхил цагаан гартай, нүүрэндээ энгэсэг түрхдэг залуучуудад би л лав дургүй. Харин дэргэд байхад түшигтэй, холын бодолтой уужуу дотортой ханхар сайхан Монгол эрчүүддээ би хайртай.

"Увдист цэцэгс бүжих ертөнц" бүлгийн гишүүн

Гэгээнсаран